恒指由去年4月28588點跌到而家19520點，已令股民由瘋狂變成悲觀。目前散戶持有嘅除咗現金、就係蟹貨，簡單啲講，散戶已經冇力同你沽落去，基金？佢哋只能保持有限現金水平，因此不可能有動力再跌多個9,000點。
金融海嘯同而家最大嘅分別，就係主要國家貨幣基礎大增，以中國為例，2015年底相比2008年，M2餘額上升1.8倍。與此同時，雖然A股股數相比2008年，據報已經翻一番，但非流通股變為流通股，實際上都唔會沽，加上IPO咁慢，所以2008年至2016年，中港實際流通股票規模，大概只增加幾十巴仙，增幅遠低過M2，當年嘅10676點，或許係今日16000點左右。
市賬率印證上述推斷。金融海嘯恒指最低位10676點，市賬率係0.9倍，如果今時今日要跌到去市賬率0.9倍，就係16635點。
16635點係終極底？又未必有咁低。跳去技術分析，恒指14個月RSI目前係37.51。過往25年，恒指14個月RSI底部介乎33至38之間，每次月底觸及呢個水平，都有一半機會出現兩個月或以上嘅反彈市，彈幅起碼10%，另一半機會係重返牛市。結論係，中線已離底不遠，投資者不妨分注撈，等食一個兩、三個月反彈浪。
晉佳
https://www.facebook.com/advanceguy1/