台灣總統大選一如所料由民進黨蔡英文勝出，但得票卻令唔少人稱奇。佢以689萬票勝選，得票較香港由小圈子選出嘅689票特首梁振英多一萬倍喎！八方唔知CY會唔會汗顏，但似乎有台灣嘅傳媒，唔信香港特首只得689票！
台灣東森新聞昨午報道大選出現好巧合嘅689賽果，即係蔡英文、現任台灣總統馬英九以及香港特首梁振英，佢哋當選嘅得票都同689有緣，名字都有「英」字，但螢幕顯示CY嘅得票，竟同蔡、馬一樣都係689「萬」票？
差之毫釐，謬之千里，其實CY得689票，同一萬已經差好遠，何況六百幾萬？但好難怪東森嘅，一區之首只得689票，又確實幾荒謬！不過咁，就算係一「萬」都冇，又如何？CY咪一樣當選。
冇受台選影響超然翺翔
而CY心情似乎亦冇受台灣總統選舉結果影響，噚日朝早笑容滿面出席國泰航空活動，同250個基層家庭及首度搭飛機嘅小朋友，齊齊喺香港上空暢遊90分鐘。CY致辭時仲話，呢幾十年加起嚟嘅飛行里數應該等於環繞地球100個圈喎。
李八方
mailto:[email protected]