今年一開市就出現環球股災，基金朋友跟密西比說，若果2015年投資環境是百年一見，今年年初首兩個星期，應形容為二百年一見。他說：「舊年咁大上大落，其實好多股災都係咁，只係用短短數個月時間，就走完急升同急跌周期就比較少見，但勢估唔到，今年一嚟就自殺式股災！」
友人續說：「你見美國每次決定加唔加息都搞咁耐，好大原因都係驚撳爆個市，或者咁講，要做到撳爆得嚟又唔洗負責任嗰隻……中國就慌死個市唔死咁樣，唔畀沽貨，又唔畀個市跌，咁仲係市場係嚟？個市好景可能一、兩日消化到，但呢個時候咁樣做，同自己隊爆自己無分別，仲唔係二百年一遇？」
朋友越說越興奮。他說：「市場有個恐怖傳聞，就係無論長線、短線、對沖、外資、港資同中資基金，呢兩個禮拜都係蝕錢！當然，全球股市跌到咁，買乜都會死㗎啦，但係連沽空買跌嗰啲基金都輸，呢個先恐怖。」
後市如何？朋友笑說：「星爺話齋，一係就死有餘辜，一係就死不足惜，你自己揀啦。」兩個都「唔揀」可以嗎？
密西比