喺中國一杯30幾蚊人仔嘅咖啡，越貴越有人買，這並非中國嘅錢易賺，而係有間美國公司做到乜嘢叫本土化策略。
美國咖啡連鎖店星巴克自1999年進軍中國，收入仍保持增長，關鍵是捕捉到中國步向消費型經濟，集結中產客群，成功推行本土化策略。最近有調查話近半數內地客幫襯星巴克已經係習慣，另有人認為去星巴克係一種自我獎勵，可見此種咖啡消費文化切合中國人愛以消費證明自己嘅價值模式。
星巴克喺內地今年將開多500間分店。行政總裁Howard Schultz之前到成都舉行創業演講搵馬雲站台，公司又向內地全職員工提供房屋津貼，原來星巴克總裁比我們更懂甚麼叫國情。同時，星巴克喺天貓開網店賣咖啡禮品卡同電子咖啡兌換券，相信有助帶動中國銷售同市場滲透率。
中國人均咖啡消耗量每年為5杯，相比歐美日等發達國平均每年160杯至250杯，可見內地市場潛力龐大。星巴克連計中國嘅亞太區上季收入增逾倍為6.5億美元，僅次於美國。期內同店銷售升6%，少過美國8%，但亞太區店內人流增幅有6%，超越美國同其他市場。星巴克股價上年累升超過四成，跑贏標指負回報。今年咖啡豆價回落，紓緩成本上漲壓力，有望抵銷人仔貶值同中國經濟放緩影響。
Captain Cool
本欄逢周一刊出