康泰創辦人兼大馬拿督黃士心愛駒「旅遊首席」之前在高伯新馬房，於二、三班之間攞過三亞兩季，就算落第亦從未輸多過三個半馬位，公認有高質素兼忠心，但由於在港始終搏來搏去贏唔到，令黃士心萌生去意，拉離高伯新，轉投葉楚航馬房。
「旅遊首席」健康狀況良好，轉倉後火速投入備戰，繼本月5日試沙田1000米草閘後上第二後，這天再由潘頓操刀，參加第三組快活谷1200米草閘，結果再一次展現凌厲後勁，直路從外檔一湧而過，走勢非常強勁，追馬意慾十足，短距離力壓另一高班馬「福毅」勝出，季軍係「神威敖翔」。
「旅遊首席」可以話一切準備就緒，隨時可上陣爭勝，亦可以話係近期潘頓新接手馬匹中，最有分量一隻。「旅遊首席」季初曾與「天才」喺二班串Ｑ，「天才」再出再贏已加到101分，「旅遊首席」家陣僅81分，想贏番場真係唔難，高伯新冇咗呢隻馬，真係無話可說了。