唔跑步嘅人最多藉口；跑步嘅人冇乜理由。
唔跑步嘅人放假比平日輕鬆；跑步嘅人放假比平日辛苦。
唔跑步嘅人做運動係為咗瘋狂食好嘢；跑步嘅人食好嘢係為咗瘋狂做運動。
唔跑步嘅人對數字敏感，不過係緊張個人財產PB（personal belongings）多啲；跑步嘅人亦對數字敏感，一聽見朋友嘅PB（personal best）就羨慕。
唔跑步嘅人睇人，焦點係人哋嘅美色以及身材；跑步嘅人亦鍾意睇人，好多時仲會由頭睇到落腳，然後仲口噏噏話正，講緊個跑姿好正、個動作好靚、條跑褲好靚，當然亦會順便睇吓個靚樣。
唔跑步嘅人鍾意儲飛行里數；跑步嘅人鍾意儲跑步里數，出埠跑嘅就兩樣都儲。
跑步嘅人係殘忍嘅，口口聲聲話好鍾意對跑鞋，但一着爛就丟，頭也不回；唔跑步嘅人反而有愛心，嗰頭話儍嘅先去跑，呢頭儲埋十幾廿對靚波鞋，齋睇唔着。
跑步嘅人喺終點就算大風大雨都陽光滿面，因為啱啱捱完；唔跑步嘅人喺假日黃昏就算夕陽無限好都愁眉苦臉，因為聽日有排捱。
跑步嘅人明白早到是美德，唔係因為約咗人唔遲得，而係唔想自己咁心急。
跑步嘅人其實好矛盾，一方面明白總有人快過自己，但另一方面又永遠相信自己今次可以跑得快過上次，下次又一定可以跑得快過今次。
唔跑步嘅人唔會影響到跑緊步嘅你，但跑緊步嘅你可以感染到唔跑步嘅人。總之唔好急，最緊要跑！
KEYMAN
節目主持