呢幾日氣溫下降，仲成日落雨，本月24日經典一哩賽當日，據報只得番11度，呢啲凍冰冰嘅天氣，唔係個個頂得順。
其中一個就係雷神莫雷拉，佢嚟自陽光與海灘嘅巴西里約熱內盧，呢幾日晨操嘅冷雨未算極凍，但雷神已苦瓜乾咁嘅樣，佢話自己穿兩件外套，外面防水嗰件要成千幾二千蚊，縱使着夠衫，但朝早寒風中操馬仍好難頂喎！
講到禦寒能力，雷神就不及巫斯義，老巫四萬咁口，佢話日前返法國渡假兼慶生，當地日日零度以下，香港有十幾度簡直perfect喎！
講番今期賽事，老巫第五場隻「三思飛駒」，來港後養傷超過成年，直至上月底先在港初出跑1400米，沿途殿後，直路求其追幾步，就追入第五只輸兩個馬位，嗰場殿軍「勢必跑」再出更已補中贏馬，可見「三思飛駒」有幾厲害。
「三思飛駒」上次拼後只小休一日就復課做工夫，埋門又拍跳又試草地，操練非常積極，腳患已經冇晒問題，今次「三思飛駒」大幅增程角逐三班1800米，老巫接受訪問，佢話一啲都唔使驚，因為「三思飛駒」性能係中長途馬，狀態比前大為提升外，底質亦應比由低班升上來六連捷嘅雷神座騎「團圓飛舞」為高，「三思飛駒」絕對有力帶來驚喜喎！