有「天下第一高手」稱號之莫雅，將於今次賽事(17日)開始在港客串至下月尾，這位冠軍級騎師今季曾於國際騎師錦標賽之夜及香港國際賽日上陣，結果均有馬贏，除了證明騎功了得，練馬師亦樂於提供支持，今戰莫雅座騎中，其實以一對葉廐馬「勝在煌」及「實業風采」最值得優先留意。
唔講大家可能唔知，葉楚航歷來與莫雅合作兩次，分別為「明駿之寶」及「利好」，兩駒均於騎師賽抽配莫雅，結果都順利建功，可見兩人八字甚夾。今次葉楚航把握機會將「勝在煌」及「實業風采」交由莫雅上陣，擺明想借助騎者之騎功求勝。
第五場三班1800米草地之「實業風采」曾兩次角逐田草C加3欄賽事，取得一冠一季未失三甲，可見窄場性能出色，今次試埋大閘才重返強項路程，排1檔當然唔可以睇小。
至於第六場四班1400米之「勝在煌」今季四戰獲一勝兩位兼未失獎金，如日方中之四歲馬，難得由好手壓陣，坐位望贏應可做到。