基斯坦奴朗拿度（C朗）自從同艾琳娜分手之後，不斷傳佢同唔同女仔有嘢，最近又有小道消息話佢同哥倫比亞辣模撻着。不過又有報道話C朗阿媽幫緊佢搵第二個代母，準備製造第二個小C朗。
C朗喺上年聖誕期間去咗美國邁阿密，有傳佢係再搵當地產科醫生，研究吓再搵代母生BB，據報C朗阿媽多洛雷斯一直都有同佛羅里達方面有聯繫，傾緊呢件事。
阿媽幫佢搵代母傳宗
不過英國《太陽報》就有唔同講法，話C朗去邁阿密其實係密會哥倫比亞性感模特兒娜達莉（Nataly Rincon）。其實自從C朗同艾琳娜喺上年年初分手之後，近一年傳出話係佢新歡嘅女仔冇十個都八個，但似乎都係得個吹字。其實既然有新女友，又想生仔嘅話，仲使唔使搵代母咁麻煩呢？
C朗嘅愛情取向同傳宗接代嘅問題睇怕繼續有排傳，而佢嘅去向一樣新聞多多。有指佢同皇馬主席佩雷斯關係日漸變差，後者都有打算趁早賣走佢套現；但大戶巴黎聖日耳門就開始減退斟介佢嘅興趣，反而打算全力收購更年輕當打嘅巴塞隆拿前鋒尼馬。