新加坡航空噚日推出新嘅頭等艙中式菜單概念「食全時美」（圖），普通話諧音「十全十美」，由名廚兼蘇浙匯副總裁朱俊設計，力sell採用時令食材，連配搭嘅茶葉都係精心挑選。朱俊話呀，食全時美呢個概念來自孔子話過「不時不食」，希望客人享用美食同時領略到中華傳統上「天人合一」嘅境界，滿足味蕾同時滋潤精神咁話。
咁即係有乜食呢？話得係不時不食，就每一季都唔同嘅。家陣冬天陰寒濕冷，就最啱滋補。九道菜餐單中，有三款頭盤、一款燉湯、三道主菜同一款甜品，包括燉湯腌篤鮮、燉海參配九孔鮑同臘味飯咁。茶葉亦會隨四季轉換，如𠵱家冬天就飲鳳凰單叢茶。
新航公關話，個餐單每季都會大執，希望經常帶畀客人新鮮感。話說早兩日國泰介紹過，頭等艙客人有厚切西冷扒，仲可以揀幾多成熟，唔知新航呢個頭等餐記者會，係咪想同國泰比拼下呢？