今年第3度跑渣馬的前HotCha成員張惠雅（Regen），雖然外形嬌滴滴，但今年已是第2次挑戰半馬，希望挑戰去年的2小時46分鐘成績。Regen坦言以往體內缺乏運動細胞，未想過今時今日會享受跑馬拉松：「前幾年我喺澳洲返嚟，公司叫我跑10公里賽，同我講跑晒全程當你贏。第一次跑，去到4K已經嗌救命，點知符符碌碌，跑出嚟成績又OK喎。自此之後，我開始調節自己步幅節奏，糾正錯誤姿勢。」
跑馬拉松，要靠先天體質和後天鍛煉，但均衡飲食對一個跑手同樣重要：「呢段時間一定唔可以食油炸同生冷嘢，跑前會多食碳水化合物和蛋白質食物，不過最緊要都係媽咪煲嘅湯水，人參湯補氣，海帶湯同粉葛湯去濕毒，花旗參加杞子焗水飲去燥熱。每星期飲兩碗，脾胃好啲，人都精神爽利啲！」
採訪：王梓嫚