多匹香港馬已報名2月中至3月底一系列杜拜美丹馬場的級際賽，兩匹曾征杜拜的前馬王「威爾頓」、「軍事出擊」均榜上無名，反映已決意留港參賽。
而上季香港馬王「步步友」因傷已提早唞暑，當然亦沒有報名遠征。較特別是只評94分的二班馬「好靚仔」，雖然已接近兩年未勝，今季四戰全落第，在港亦未曾在泥地上名，但此駒卻報跑全球最高獎金賽事，泥地2000米一級賽杜拜世界盃，認真志氣可嘉，且看牠能否入選。
其他報名馬方面，本港泥地王「準備就緒」早前雖喺日本大敗，但無礙佢再向外闖的決心，共報麥通第三輪挑戰賽、納哈爾塔錦標、杜拜世界盃及高多芬一哩賽四項泥地賽，但由於部份喺同日上演，「準備就緒」最多只可角逐其中兩場。
至於初步睇機會最高香港馬，就係阿喬斯短途錦標嘅「幸福指數」，隻馬2011年4月8日出世，上年3月底爭阿喬斯時其實只剛滿4歲，但都拼入亞軍，今年大一歲成熟再進，仲贏埋國際賽，計卡士絕對有把握喺杜拜收復前失。