白鴿黨中西區議員許智峯急速冒起，佢喺區議會開創抗爭先河，被封黨內「激進派」，反叛基因細細個已經有，佢向八方自爆，讀書時成日出貓，仲試過因此被記大過；現為兩孩之父嘅佢當然叫小朋友唔好學啦！
34歲嘅許智峯喺聖公會聖西門呂明才中學讀書時，頭髮都幾長㗎，佢形容：「可以話係郭富城頭，但其實都係杜拉格斯（《龍珠》漫畫角色），哈哈」。呢位Beyond狂迷，中學時愛夾band，不時出巡表演，高中時佢曾經喺中環遮打花園音樂節露兩手。
當年佢着住校服彈結他，呢個band仔look應該迷倒唔少女仔啩？「係㗎，係真係多啲女仔圍埋嚟識你㗎！」至於有冇用呢樣專長媾女，佢笑笑口話：「（彈結他）總有啲副作用嘅！」原來佢幾歲大時都學過小提琴，話媽媽管教唔算好嚴，畀佢自由發揮但唔係完全放任：「我喺學能測驗時冇乜溫書，阿媽都日哦夜哦㗎。」雖則有啲反叛基因，但佢強調自己係斯文人嚟㗎。