【食の新登場】7-Eleven開Cafe　賣拉花咖啡車仔麵

今次真係估你唔到！平時「梗有間喺左近」嘅便利店7-Eleven，最近竟然踩場撈過界開Cafe。全新概念店位於金鐘力寶中心，平日喺7仔做到賣到嘅嘢，呢到都有，好似零食、飲品、日常用品及繳費服務外，仲會兼賣埋熟食，而且會喺概念店獨家發售。睇睇menu，最特別莫過於“Noodle Bar”，十足港式車仔麵檔，配料、湯底、麵底由食客任揀，種類超過二十款，包括瑞士雞中翼、泰式香茅魚餅、越南扎肉、溫泉玉子、日式叉燒及韓國泡菜等，四款麵則有拉麵、烏冬、米線及韓國水晶粉，大玩fusion style。價錢方面，淨湯麵$28，配料就逐款計，有$5、$8、$10選擇，如最基本的一餸一麵「脆皮芝士腸烏冬」要價$33，屬中價位。除此之外，概念店仲有駐場咖啡師調製拉花咖啡、三款健康燕麥早餐及英式早餐，包括香滑炒蛋牛油軟包及英式早餐薯蓉杯，經過金鐘不妨試試。