隔牆有耳：
阿蘇登懷舊車廂　撐電車夠地道 - 李八方

電車阻路？行路快過搭電車？呢啲睇法認真「新奇」。電車絕對係香港人嘅歷史同生活一部份，香港電車公司昨舉行「觀光電車啟動禮」，呢架全港首部觀光電車，係仿1920年代設計嘅復古電車，上層採開放式設計，下層則係懷舊古典車廂，乘客登上懷舊電車，欣賞香港美景，都幾特別㗎！

商經局局長蘇錦樑Greg及旅發局主席林建岳等都有出席啟航禮。Greg So活動後立即喺fb圖文並茂，話好高興香港電車今次加入創意點子，推陳出新，將遊電車河變成多角度同有趣嘅旅遊體驗。佢大讚車上展示嘅舊車票、打孔機，以及有着咗制服嘅車長同服務員，對沿路各區故事及地標作解說，係一趟地道文化同歷史之旅！呢架最多載36名乘客嘅觀光電車，本月24日起正式啟航，來往銅鑼灣同上環西港城，每日6班車。成人票95元、小童票65元。