台灣總統大選，民進黨蔡英文，如無意外砌低國民黨朱立倫成台灣首位女總統，所以選戰氣氛一直唔激烈，但政界今次組團訪台觀戰嘅氣氛卻未有減少，原來唔少人想睇嘅唔係蔡朱大戰，而係立委選舉、藍綠以外第三勢力嘅冒起。
接受台北經濟文化辦事處邀請喺呢幾日訪台嘅白鴿黨單仲偕，噚日同團友黃碧雲、涂謹申、梁繼昌同莫乃光（圖），先後去咗國民黨、民進黨同親民黨三位候選人嘅競選總部參觀，但單雞話此行最想睇嘅其實係，因為太陽花學運而崛起嘅第三勢力對台灣傳統政黨有乜影響？前晚仲去咗政黨「時代力量」音樂會，感受下新生代點搞選舉！新興政團都喺香港區選打出一片天，難怪單雞此行都要取經，知己知彼。