這天沙田馬場原本有兩組大閘，但因大雨關係，最終縮成一組，更只得5匹馬參加。
結果這組1200米泥地大閘，由勢成經典一哩賽熱門馬的翻版步步友「澳斯卡」勝出，此駒由雷神莫雷拉操刀，早段按住跟喺第三位，由於只面對一些三班尾至五班的對手，完全未有受到壓力，因此「澳斯卡」末段雷神冇乜點騎已輕鬆透出，以半身位擊敗亞軍「皇龍寶駒」，跑第三係「魔連奴」，四、五名就係「忠心義氣」、「公平競技」。
至於「澳斯卡」嘅老對手綠魔「有得威」，原本有報名參加呢組泥閘，但臨時退出咗，延日一日改為配巫斯義參加周六(16日)嘅1200米快活谷草閘。
講番「澳斯卡」，在港6戰1400米或以下賽事，獲4冠1亞1季全上名，其中上仗更拋亞軍「有得威」近三個身位，有幾厲害有目共睹，雖然本月24日經典一哩賽冇長力根據，但「澳斯卡」母親贏至2400米，曾四度勝出一級賽，包括長途嘅新西蘭橡樹大賽，係2008年新西蘭冠軍長途馬，所以雷神揀騎「澳斯卡」而放棄「首飾太陽」，絕對有佢嘅道理。