過咗秋天，都仲有算賬呢回事？梁班子無奇不有，就算係，又有乜咁出奇呢？now新聞台報道，曾經企喺特首梁振英身邊、聽到CY自言特首地位好超然時打咗個突嘅特首辦助理處長（傳媒）黎日正Anson，即將被調至日內瓦海外辦事處，莫非有超自然反應，所以非自然咁被調職？
由於方丈一向予人好小器感覺，加上Anson喺2014年底先出任此職，喺特首辦留咗一年多就走人，比通常政務官兩至三年先調職明顯快咗，難怪網民紛紛質疑，「打突先生」肯定係被「整治」而被送到冇雷公咁遠嘅瑞士。但有政府中人卻話，呢次未必直接關方丈事，皆因駐海外嘅職位遠離煩囂管治核心，向被視為優差，有時甚或爭崩頭；如果唔係自願，好難逼到人調職。
黎日正：不評論
據知公務員事務局通常會喺有關職位出缺前半年或更早，喺內部問吓有冇人有興趣調任？皆因交接、搬遷及安頓都需時！若然真係冇人有興趣，局方則會主動出擊，問吓看似有興趣又適當嘅人選，直至搵到心水為止。
Anson到底係主動定被動？係被逼走？抑或「用自己方式」暫時逃離熱廚房？八方問過Anson，佢只回應「不評論相關報道」。八方聽聞，Anson唔係短時間內就走人，至少都同接任人、現為商務及經濟發展局首席助理秘書長余健強做好交接工作先。八方仲八到，現年40歲嘅Anson係單身，冇家室包袱，難怪係駐外「超然之選」。
李八方
mailto:[email protected]
