當CY（圖）話要多謝《東方日報》，相信大家都估到，酷刑聲請引起嘅假難民問題，一定獲梁班子高度關注，與此同時，立法會好多議員都爭相跟進此問題，認真「正義」，保安事務委員會更建議去澳洲考察酷刑聲請嘅實施問題，話唔定有朝一日變成全球華人聲援嘅大事喎。
之不過呢，公民黨法律界議員郭榮鏗留意到，CY日前話如有需要就退出禁止酷刑嘅公約喎，既然係咁，唔應該去澳洲，應該去北韓囉，熟悉國際時政嘅陳家洛就話去津巴布韋仲好！工黨李卓人就問嘞，如果真係要睇實施情況，唔係應該去歐洲咩？點解會係澳洲嘅？
民建聯陳鑑林反駁，外訪地點已經過委員會討論，已有同事報名參加，如有意見應該喺諮詢時提出，總之都係力撐要去考察，最終內會表決後，支持多過反對，咁就成行嘞。