巴塞隆拿辛辛苦苦捱完長達一年嘅轉會禁令，今個月終於可以派阿達杜倫同阿歷斯維度兩位新兵上陣，嚟緊就輪到皇家馬德里同馬德里體育會試吓呢種冇得買人嘅痛苦滋味。國際足協噚日宣佈，紀律委員會裁定馬德里雙雄違規簽入18歲以下球員，所以判佢哋喺未來兩個轉會窗（2016年夏天及2017年冬天）冇得註冊新球員。
換言之，過咗今個冬季轉會窗之後，馬德里雙雄要到2017年夏天先至可以買人。除咗轉會禁令外，皇馬同馬體會分別被國際足協罰款36萬同90萬瑞士法郎（約697萬港元）。雖然馬體會已表明上訴，皇馬就未知，但我求大俠覺得呢兩間球會肯定趁剩番呢半個月狂買人，儲定啲新球員。以馬體會嘅風格，相信佢哋會喺南美同葡超狂掃年輕球員，至於皇馬呢，應該會喺呢半個月刮起一場轉會大風暴。話唔定過兩日大家會見到夏薩特、保羅普巴同迪基亞齊齊以天價加盟皇馬都唔定。