近期戰績麻麻嘅南華，噚日宣佈幫南華贏過唔少錦標嘅兩屆足球先生山度士回巢，擔任顧問，協助米路執教，唔好連續兩年四大皆空。上季尾米路接手南華後，季初聯賽五連勝，點知近排幾場大戰都輸。要改善表現，南華除咗增兵，仲搵埋目前喺車路士足球學校（香港）擔任技術總監嘅山度士做顧問。山sir今日仲會督操㖭。另外，前厄瓜多爾國腳菲力斯轉會紙已經到咗，後日對流浪可以上陣。