噚日小弟做咗個小普查，分別同五位同事講兩句說話，試吓反應，第一句說話「我估恒指呢兩年跌到一萬點」，佢哋大多數會認真思考呢句話，有人答「如果（下刪一萬字）……就會一萬點啩……不過我覺得萬五有承接嘅」，又有人答「我諗未必嘅」之類，只有一位答冇可能。結論係：被訪者覺得跌到一萬點唔易，但又有可能。然後第二句話同呢班同事講：「我估恒指呢兩年升到去三萬點」，其中一位即時回應「你都黐線」三位即時答「冇可能」，剩番語氣最保守嘅同事話「我諗唔會」結論係：大家覺得三萬點係天方夜譚。
睇番近排大行出全年預測，21500、22500都有，25000係最樂觀，估27000睇怕畀人鬧痴線。回想起，2009年3月尾，有一日我強烈地覺得港股見底，然後同我身邊朋友出alert「牛市啦！快啲買嘢呀」，得到嘅回應相當冷淡，有人話「係就好，如果係牛市，我就……」大家當時好客氣地回應我，但我心裏面好清楚，佢哋心底裏答案係「你都戇x」。
呢一刻，或許有好多人覺得恒指跌到一萬點嘅機會，大過升上三萬點好多，偏偏呢個世界，絕大部份有錢人係想恒指升上三萬點，而唔係跌落一萬點。實情係，恒指要升上三萬點嘅難度，絕對低過跌至一萬點好多，點解？下周一再續，到時再研究最可能出現嘅恒指低位。
晉佳
https://www.facebook.com/advanceguy1/