周星馳執導嘅電影《美人魚》主題曲搵咗鄭少秋同「雞姐」莫文蔚合唱，佢哋揀咗首舊歌《世間始終你好》。錄音當日周星馳仲興起走埋入錄音室一齊錄唱。星爺仲憑歌寄意，唱到歌詞「世間始終你好」嘅時候，忍唔住搭住合作多年嘅莫文蔚膊頭，已婚嘅莫文蔚就笑笑口話：「你𠵱家終於知道哩。」據知，莫文蔚係星爺眾多女友之中，最有結婚衝動嘅一位，可惜最後冇緣喺埋一齊。
秋官邊唱邊跳
莫文蔚接受訪問時話好榮幸同秋官合唱，仲講到兩人緣份開始喺《食神》年代：「雞姐成日唱『情與義，值千金』就係秋官唱嘅歌。同星爺都好耐冇合作，佢搵我證明識貨。」秋官話唱番自己時代嘅歌當然駕輕就熟，佢話：「呢個結合當然天衣無縫，仲可以一路唱一路跳。」
另外，鄭少秋同麥玲玲噚日喺跑馬地馬場出席記者會，宣傳年初三嘅賽馬活動，到時秋官會首次喺沙田馬場獻唱。秋官講到為拍戲曾經去學騎馬，佢話：「啲人話馬同女人一樣，要𠱁嘅，騎馬最緊要唔好緊張。」秋官仲話自己都試過喺馬背上跌落黎，不過唔會有陰影。
撰文：馮仁昭