皇家馬德里買人賣人向來出人意表，小弟覺得皇馬今夏清走基斯坦奴朗拿度（C朗、圖）都唔係奇怪嘅事，因為皇馬已經榨取咗C朗最巔𥧌嘅實力同影響力。
隨住佢踏入30大關，C朗毫無疑問地會走向下坡，對皇馬價值越來越低。與其等C朗衰落，皇馬有可能提早斬纜，推加里夫巴利上位。當皇馬主席佩雷斯買巴利時，外界都認為巴利係用嚟接班C朗，而賓尼迪斯舊年上任係帶有「政治任務」，一方面削減C朗嘅重要性，另一方面捧巴利上位。
巴利𠵱家26歲，仲有三至四年高𥧌，C朗下個月就31歲，高𥧌已過，而且巴利係球壇英語系球員中嘅第一人，明顯勁過朗尼同哈利卡尼，個人影響力強，而且巴利同皇馬一樣都係由「三間」贊助。對於「三間」嚟講，佢哋更想見到自己人做皇馬頭牌，多過屬於「一剔」嘅C朗。同埋以皇馬嘅作風，好少球員喺度掛靴，強如魯爾同卡斯拿斯，冇晒利用價值都要走人。C朗雖然係勁，對皇馬近幾年發展有好大功勞，但佢喺隊中地位遠未到魯爾同卡斯嘅層次，同埋佢都唔太得皇馬球迷歡心，因為季季都話返曼聯，之後就博加人工。
皇馬要買人，目標肯定係新一代嘅90後球星，最好當然係未來球壇第一人尼馬，不過尼馬喺巴塞，皇馬根本買唔到。咁皇馬會買咩人？睇吓金球獎最後25人名單，仲有邊啲90後球員可以買就得。奇雲迪布尼啱啱去咗曼城，難買！咁剩番嘅係得保羅普巴同夏薩特。一個意甲第一人，另一個係英超頭牌，似係佩雷斯會買嘅人。
文：咖喱