美斯日前好開心咁喺屋企騷晒五座金球獎出嚟，但佢死對頭基斯坦奴朗拿度（C朗）就心情勁差嘞。C朗唔係因為輸咗金球獎而唔開心，而係因為佢喺老家馬德拉嘅銅像俾人整污糟咗，銅像個背脊俾人噴咗「MESSI」同埋「10」，擺明係針對佢，寸佢比唔上美斯啦。
家姐嬲爆：非常可恥嘅行為
效力皇家馬德里嘅葡萄牙球星C朗喺前年12月返家鄉馬德拉島，為佢個高11呎嘅銅像進行揭幕儀式，當時佢咁講：「呢個係非常特別嘅時刻，我好開心呢度有我嘅銅像。」估唔到一年幾之後，佢個銅像就俾人惡意破壞，噴咗美斯個名同號碼，對C朗嚟講絕對係非常侮辱。
C朗家姐嘉蒂雅好嬲咁講：「身為葡萄牙人，我覺得好尷尬同好傷心。呢個係非常可恥嘅行為，破壞銅像嘅人好明顯係妒忌C朗。呢班人要為自己嘅行為負責，佢哋唔單止傷害咗C朗，亦傷害咗呢個美麗小島（馬德拉）。」嘉蒂雅繼續話：「喺呢個地球，總有一班人接受唔到其他人成功。庸碌嘅人喺呢個世界上，永冇可能成功。」
C朗即買「波子」𠱁自己
現年30歲嘅C朗輸咗金球獎，自己個銅像又俾人整花，希望佢見到自己嘅新玩具時可以開心番啦。C朗日前將同新車嘅合照上載至社交網站，心情亦好似唔錯；佢呢架保時捷911 Turbo S聽講使咗146,000鎊，不過對家財億萬嘅佢，只係散紙嚟箒。
C朗晒靚車，美斯就晒獎座。喺2015年幫巴塞同阿根廷入咗52球嘅美斯，日前喺屋企一次過騷晒五座金球獎出嚟，側邊仲放咗巴塞隆拿同埋阿根廷國家隊波衫，明示佢係效忠巴塞同埋自己國家。而贊助商「三間」亦非常識做，特登造咗對全新白金波砵送畀佢，波砵上有美斯個名同樣，砵入面仲寫有「El mas grande de todos los tiempos（史上最偉大）」，以表揚佢呢個史無前例嘅成就。
美斯貴為現時最勁嘅球員，自然大把富豪球會爭住要。來自加泰羅尼亞嘅消息指，中國一個大集團正籌集資金，希望用4.5億美金將美斯由巴塞挖去中超，據聞呢間球會好似係有許家印同馬雲撐腰嘅廣州恒大，但美斯𠵱家喺足球事業黃金期，點肯「降呢」去踢中超呀？
