近兩次快活谷夜馬，練馬師文家良分別勝出「歡樂小子」及「電子群英」，在港從練以來已累積398場頭馬，尚欠兩場便可達至400大關。睇番文廐今期(13日)參戰馬實力不弱，當中一對王牌馬「善勝」及「行善積福」均有績可尋，話唔定可以替倉主起孖，寫下從練新的里程碑。
第八場三班1200米之「善勝」今季初出僅以頭位之微不敵「錢照收」，後駒之後再跑三仗獲兩冠一亞，已升至89分水平，「善勝」在三班77分，可謂舉足輕重，上仗賽前咳嗽大熱倒灶，敗後立即安排轉倉，反映幕後求勝之心，文家良接手後亦做足工夫，上月22日試大閘更輕勝而回，等番首本戲谷草1200米上陣，打王牌報名，決心要轉倉即拼求交代。
至於第七場三班1650米之「行善積福」上仗跑第三，該役四、五名「非常堅」及「奇真」再出非冠即亞，可見水準甚高，今仗有力收復前失。