本土熱之下，龍獅旗不時招搖過市，北大人睇見梗係唔like，但銅鑼灣時代廣場膽大包天咯，竟然喺今個農曆年帶動「龍獅熱」？各位左派重炮手，稍安無躁，皆因佢哋搞嘅只係「龍獅盛宴」展覽，展出中國傳統嘅瑞獸，包括龍、南麒麟與北麒麟、貔貅、南獅同北獅，亦會展示舞獅樂器、傳統獅劇表演等，旨在傳承中國傳統文化，北大人可以放心嘞。
今次展覽仲請到1954年開業、元朗舊墟「李炎記」花店製作全人手做嘅花牌，手寫大字、人手上棚，真係好有本土特色！其實「李炎記」花店招牌同具歷史價值嘅物品已經喺上年夏天俾香港歷史博物館收藏，同場亦會播放「李炎記」花店嘅花牌紮作技藝，有機會畀大家撐撐本土文化。展覽2月5日至28日朝10晚10舉行，2月4日立春日會有開幕禮。