前晚《毛記電視第一屆十大勁曲金曲分獎典禮》，「繁忙兒童合唱團」的演唱令人拍案叫絕，亦令人心痛。細味歌詞，道盡小小人兒每天要承受無窮無盡功課壓力，還有操練TSA、「興趣班」、大大小小考試，老師的壓力，家長的期望，還有同學仔之間相處的問題——你都有做過小學雞，冇理由唔明。
劉小華獻唱一曲《補充練習無間做》，歌詞內容「我已做到勁憔悴 再做我就嚟去 全日也未曾睡 其實我 我未夠十零歲 焗我成材媽咪佢太衰 」「明明我已晝夜無間想討好老母 夢想中的Summer為何還未到 明明我已奮力無間 補充喪做 我不玩也為活得好 你問我想點 唔能知道 在這炎夏中無間做……」
台下有觀眾笑不攏嘴，覺得呢個豆釘chok得嚟歌詞幾搞笑。其實一啲都唔搞笑，這是小朋友真真正正的「正常生活」——在坐家長師長都有份催谷的「正常生活」。
笑中有淚。或者咁樣講政治正確啲，但好快又有人話，小朋友唱「老母」，粗鄙。
劉小華媽媽前晚於fb澄清，謂：「其實唔加動詞同助語詞，『老母』唔係粗口。老母，即媽媽、母親、娘親，意即母親，其中『老』字與『老師』、『老闆』一樣，同為尊稱之意。」
黃秋生都有留意到，佢就喺fb寫道:「老母都係粗口？唔係呀？咁老豆係咪粗口？媽媽應該係粗口，媽媽聲吖嘛。而家啲人係咪食錯藥飲錯水呀？」