賭王千金何超蓮繼早前獨自與霍啟山在廣州「傾生意」後，前晚二人又再度蜜會！晚上約7時許，兩人現身尖沙嘴半島酒店的Chesa嘆燭光晚餐，由於餐廳沒有VIP房，兩人與其他客人一樣坐大廳，着黑西裝的啟山和粉紅衫襯短裙的超蓮並排而坐，兩人在浪漫燭光下喁喁細語。
側門離開四圍望
早前超蓮被拍到與內地百億富二代劉根森同遊樂園，不過超蓮再與啟山撐腳枱，真命天子似乎呼之欲出！前晚兩人在餐廳內被不少食客認出，啟山和超蓮十分謹慎，沒有好似司馬燕前夫吳忠義般，與新歡在餐廳又攬又啜，兩人沒有任何親暱動作，但共度晚餐的兩小時內，他們都有傾有講笑不停，明顯好啱嘴形，約9時左右，由啟山負責埋單離去。
他們搭𨋢到酒店大堂後，並不是由正門離開，刻意揀側門少人出入的漢口道，首先步出的啟山負責搵保母車停泊的地點，醒目的超蓮就四圍贒，行到路口時發現記者，被撞破好事的啟山露出尷尬笑容，超蓮則抿嘴面燶燶，記者連問：「係咪正式拍拖？」、「有冇發展機會？」兩人都不發一言上車離去。而司機為撇甩記者追訪，竟連環越過雙白線，過隧道去中環碼頭後，超蓮的白色七人車忽然在路中心攔記者車，讓啟山和超蓮成功逃脫。
「普通社交食飯」
昨日問超蓮是否跟啟山拍拖？她表示只是普通社交食飯，好姊妹李蘊則代否認：「100％唔係拍拖，總之信我啦，佢真係單身，以我所知佢哋係朋友，你哋再寫佢就冇人追㗎啦，你哋害佢變老姑婆！」對於女兒與啟山撐枱腳，三太何婉珍助手Sandy昨透過電話表示：「年輕人食飯好普通，何太冇回應呀，唔該。」
採訪、攝影：黃曉程、潘冠恩、朱志聰