港股今年好似食咗瀉藥，恒指連20000點都穿埋，究竟跌夠未？不如搵散戶答你，分分鐘仲準過專家。
事緣港股呢兩日跌穿20000點，但同恒指表現掛鈎嘅盈富基金（2800）竟然好長時間喺20元有支持，估計係有散戶築起「血肉長城」，喺20元排晒盤，令到恒指跌穿20000點後，盈富依然跌唔落。
好似噚日上午11點左右，盈富喺20元掛出之買盤，涉及710萬個單位，共有551個買盤，除番開，每個買盤平均掛出1.29萬個單位，相當於25.8萬元，呢個數真係大把散戶買得起，亦反映頂住盈富嘅，似乎唔係大戶，好有可能係大批散戶。
可惜，恒指噚日下晝跌幅擴大，盈富20元都係守不住。如果閣下相信相反理論，股市只有少數人猜對，同時亦相信散戶永遠是錯的，今次散戶作為大多數人掃入盈富，確實又輸錢了，港股應該仲未跌夠囉。