《毛記分獎禮》由for fun開始，去到最後竟然兜頭熱血照頭淋，殺你一個措手不及，一時間facebook人人「#同熱愛這片土地」。冇計，鬼叫歌詞咁到肉，其中一句好應棍，「要有碇企，先要企硬自己」。
你梗係以為我用呢句，去開Page One唔賣反共書呢個topic，sorry，既然佢選擇自閹，我都唔使刻意踩多腳。
近年香港人為賺大陸錢，要努力學習「包容」，包容到條街只有「自由行概念」，失去了香港；包容到人哋周街放低足三両，我哋都笑住幫佢清場。
左一句「放棄中國市場等如放棄世界」，右一句「唔接受就聽邊緣化」。中國市場重要，但香港人何苦要妄自菲薄，自我矮化。強國人話「要不是乜乜乜，你們香港就物物物」，真係I don't give a ____！
要將正常商業買賣講到係天大恩賜，咁「香港救國」嘅次數，絕對偉大到抵得上700萬人每人收一個「精忠報國」嘅金牌。
一、人民幣大跌
呢幾日邊個出嚟救同胞個銀包？香港！唔講你唔知，「港股通」已連續第52個交易日淨流入，單係今日就有14.71億元湧港，唔少同胞當買港股就係兌港幣，「港股通」順利成為人仔防空洞。再講，香港作為全球最大離岸人民幣市場，成為人行與人民幣「空軍」的戰場，隔夜拆息一抽就抽上66.8厘，香港無啦啦成為避彈衣，幫你擋子彈。曾幾何時唔知邊個天才，仲倡議港元、美元脫鈎，改與人幣掛鈎。都儍豬，掛咗內地官員啲錢咪少一個出路？
二、港股大跌
講遠少少，其實都係早幾日，「熔斷機制」仲在生時，A股一停市，資金冇得沽，掉轉槍頭沽港股，將上年股災時，港股喺A股出事時，以身擋車做提款機一事重演。可憐香港嘅小股民，股價被質散，斬手指都唔掂。「熔斷機制」家陣R.I.P.，港股繼續跌，A股港股欲斷難斷。
三、內地之前暫緩IPO
港交所（388）畀個平台你上去吸金，連狗屎垃圾都上到板；香港樓市一早成為強國正財偏財不義之財的容身之所；香港「真．金」幫大媽資產保值、「真．奶粉」養大內地B……香港救國次數，多到數唔到！
講到尾，香港可以「救國」，係因為香港有價值；而香港最大價值，就係與中國有截然不同嘅制度。慘在唔少香港人，懶醒咁以為香港融入中國，與中國一體化，就係對香港有利，將核心價值底線越退越後，最後係就係成功融入中國，但同時代表你已經可有可無。
車！你融入中國，我去上海唔好？最後，想講，香港人要有碇企，真係先要企硬自己，選擇自閹，只會換來一句：抵死。
by千頌C@堆填區
http://fb.com/winbigwok
本欄逢周三刊出