港鐵（066）主席馬時亨一向長袖善舞，佢本月1日上任後隨即投入角色，四出進行游說同講解工作，希望成功為高鐵追加撥款。前晚佢跟大約30名股評人食飯，應該係想打好關係，亦畀佢哋了解港鐵有乜想法，方便股評人解釋畀散戶知。
大家當然最關心高鐵問題，馬時亨喺席間提到，港鐵對於高鐵可能爛尾，係冇Plan B嘅。佢估計，小股東會歡迎公司派特別息，應該過到小股東呢一關，最怕都係立法會議員拉布，如果3月前未獲立法會追加撥款，就要停工，講法同之前一樣。
港鐵前晚喺金鐘東海薈開咗3圍，宴請幾十位股評人，有與會者話，呢餐都係普通餸菜，冇鮑參翅肚，港鐵主要想介紹馬時亨呢位新主席畀佢哋識，但其實馬時亨喺金融界打滾多年，同呢班股評人本身都幾熟㗎喇。