黃一飛、黃一山（細龜）、苑瓊丹和李健仁（如花）4位當年常在周星馳電影中出現的綠葉演員，近日在張堅庭執導的內地電影《我想靜靜》中再度碰頭，雖然4人戲份不多，但搶鏡程度絕不比男女主角余少群和王心凌遜色。
現年69歲的飛哥日前在佛山為電影客串一日戲份，身形竟脹了多個碼，由「一飛」變成「七飛」！記者前日致電飛哥，對於勁發福，飛哥說：「我戒咗煙7年咪發咗福囉！」問肥了多少磅時，飛哥說：「嘩！差唔多50磅都有！」飛哥透露現時體重約有190多磅，問他戒煙後是否健康了？他說：「有好有唔好啦，譬如個人肥咗，行路唔夠氣，隻腳骨刺要醫，醫咗好耐都醫唔好。」
等星爺叫合作
可打算返香港拍戲？飛哥說：「𠵱家香港邊有戲拍？而且我個人又肥，腳又唔乜嘢（方便），要搵個人服侍吓，香港搵菲傭，我冇地方畀佢住，老婆年紀又大，服侍唔到我，所以基本上我返深圳住，返香港又易。」可想再與星爺合作？飛哥說：「我哋有乜所謂？佢叫我咪去囉，又唔係深仇大恨，見面仲有講有笑。」
對於片中不乏星爺綠葉，細龜前日說：「我哋老闆好鍾意星爺啲戲，想搵番呢班做唔同角色，見到大家咁當然開心啦！」講到飛哥發福，細龜笑說：「佢除咗中年發過一次福之外，老年再發多次福，所以𠵱家大咗幾個碼！」至於苑仔日前開工時，因與新片監製兼演員楊玉梅見面雞啄唔斷而在樓梯叉錯腳跌倒受傷，楊玉梅說：「佢坐喺地下度成半個鐘起唔到身。搞到我好唔好意思，個心好唔舒服！」
採訪：魯吉