記得中學畢業那年一次自修課，班中有人講起當年班主任做過的蝦碌嘢和醜事，全班哄堂大笑；有人隨口噏：「不如記低晒啲笑料印本特刊，10年後拎出嚟睇咪好過癮？」大家你一言我一語繼續隨口噏之際，我作為班會秘書，認真地拿起紙筆記下各人的點子；代課老師見狀吃了一驚，搭着我膊頭說：「（潛台詞：雖然你成績唔叻）只要你做咩事都咁樣堅持認真去做，一定可成功！」最終我當然係唔夠堅持，特刊無法成事。無聊的事，要認真和堅持去做，很難；但如果成功做到，效果卻意想不到。《100毛》的首屆分獎禮就是典範。「現在台」的市場觸覺和快速應變固然抵讚，最重要當然要多謝《100毛》的努力、認真和堅持，讓全港人那晚又好笑、又感動、重拾多年未試過「回家追電視睇」的感覺。
這與香港的體育事業，又有幾分相似。搞體育在香港不是被「大眾」認為是「無聊」事嗎？然而，只要認真和堅持去做，總會有回報。當晚高潮，MC仁以自己的方式突然在舞台出現，rap了這一句「……係真香港人，當然會識英雄輝（圖）！」多謝MC仁替我們曲線表達了這訊息：原來英雄輝以至一眾港隊成員一直的認真與堅持，令他們已成為「真．香港人」心中代表「真．香港」的標誌之一。這是其他銀行、地產商、國企等無論市值幾多千億，也永不可觸及的價值。
方栢翹
now足球評述員