鄭融《終身習武》在毛記分獎禮獲金曲第十位，惟前晚卻缺席攞獎，問到跟無綫有否歌手合約、是否受到無綫施壓缺席？鄭融昨日透過短訊解釋：「噚日真係病咗，腸胃炎，出席唔到都唔好意思，不要誤會是其他原因。」問到在無綫冇獎，但毛記有獎，有甚麼感受？鄭融說：「獎項都係隨緣啦，多謝無綫畀我工作機會，多謝毛記電視分獎畀我。」支持二創的鄭融說：「如果唔支持嘅話，由第一日開始都唔會決定上毛記電視，我覺得喺唔影響原創者利益立場下，透過二次創作玩吓、搞吓笑、諷刺吓時弊，都無傷大雅嘅。」採訪：皓騫