有「大師」之稱嘅工業界立法會議員林大輝，噚日請來一眾好友見證豎立喺沙田恒生管理學院嘅林大輝鐘樓開幕禮，除咗一早表明撐場嘅財爺鬍鬚曾，全國政協常委唐英年竟然離奇現身，莫非呢對唐營孖寶，有啲乜嘢景轟？
大輝讚「以柔制剛」
八方見到上屆參選過特首嘅唐唐，一到場即同下屆特首黑馬鬍鬚曾密斟，喺鐘樓揭幕前，兩人一度手指指後笑到勁開心，搞到唔少在場人士心思思，估佢哋講緊乜？唐唐其後更同大輝夾住鬍鬚曾喺台上影相，都咪話唔似唐營造勢大會呀！八方會後問唐唐會唔會鼓勵鬍鬚曾選特首？佢笑笑口話唔答問題（重點：冇話唔支持喎～）臨走前仲同鬍鬚曾握手㖭。
鬍鬚曾致辭時就話大輝係佢嘅「好朋友」，特別指大輝擔任主席嘅教育事務委員會，代表香港市民監督政府工作，而佢喺議會內最出名嘅「武器」，「係佢連珠炮發嘅四字詞語，每次發言都出口成文，字字鏗鏘」，自嘲文采及唔上大輝，但都想「拋吓書包」表揚一下，讚大輝對香港教育嘅貢獻，絕對稱得上係「樂善好施」，令人「肅然起敬」。獲贈高帽嘅大輝回敬，話鬍鬚曾每次發言都好有啟發性，最欣賞對方「以柔制剛」、「四両撥千斤」嘅解決問題方法。
李八方
mailto:[email protected]