噚日講到國際家居零售（1373）旗下日本城盤生意過去做得麻麻哋，以佢嘅簡單營運模式、採購嘅議價能力、市場地位，每間舖每個月竟然只賺一份基層人工回來（順便更正每間香港舖每月賺錢應為13,000元，而非噚日所寫6,500元，有錯要認）。首先假設佢頹廢到乜都唔改善，繼續食老本，盈利都有機會回升。第一就係租金，雖說民生舖位租金下跌空間細，但樓市下跌之下，議租空間仍然存在。日本城半年度租金1.58億元，假設未來租金跌一成，一年可慳番超過3,000萬元，再假設其他因素不變，已足夠稅前盈利升七成。第二就係新加坡業務，新加坡同香港接近，日本城只按照既有策略，繼續重複香港模式至新加坡，都有機會提供增長。
如果新CEO有心改善營運，就會諗啲計仔出嚟改善生意，例如，第一，可以將現有部份貨品貨架縮細，騰空貨架賣更多高毛利產品，當我求其諗，日本城撈埋賣手機殼，就可能成為最好賺嘅其他產品系列；第二，整個app出嚟幫客人喺舖內找出需要產品嘅位置，客戶搵貨比以前方便，自然順便買多兩件必需品。呢啲橋，閣下都可能諗到幾條。
原來呢個系列寫咗一共四篇都未寫完，聽日再搵經營阿信屋嘅CEC國際（759）同埋性質類似嘅永旺（984），同國際家居零售比拼一下。
晉佳
https://www.facebook.com/advanceguy1/