喺「強力部門」唔守規矩、有啲人又自覺「超然」於法律之上之時，噚日開幕嘅法律年，真係特別重要，唔少出席人士都豎起耳仔，聽下律政司司長袁國強致辭時點樣捍衞一國兩制同法治。
點知袁國強照稿讀到最尾嘅時候，忽然好凝重咁話，希望大律師公會主席譚允芝同律師會會長熊運信唔好介意，佢有啲嘢突然好想講。
嘩，全場當時靜默、有啲人仲心跳加速，等住聽佢「肺腑之言」，點知佢爆肚講嘅係：祝終審法院首席法官馬道立今日生日快樂，係咪好反高潮呢？生於1956年1月11日嘅馬道立今日60歲大壽，八方見到在席嘅壽星公對袁司長嘅祝福報以微笑。
其後發言嘅譚允芝亦喺致辭尾段祝馬道立生日快樂，當時咁啱袁國強喺馬道立耳邊細細聲講嘢，之後自己笑咗出嚟，但馬道立就繼續雙眼望向前喎。