中國已經開始加強資本管制，限制內地居民同企業兌換美元嘅規模，藉以遏止由人民幣貶值恐慌所觸發嘅走資潮。
可能大家冇留意，人民幣同Bitcoin（比特幣）嘅走勢，最近兩個月呈現反向走勢，反映內地人大舉將資金由人民幣兌換至Bitcoin。
至於原因，相信唔需要筆者多講，大陸人對自己國家嘅貨幣信心逐漸喪失，而Bitcoin呢樣不受監管嘅資產，絕對係逃避資本管制，將資金由人民幣轉走嘅最佳工具。
的而且確，Bitcoin由2013年底嘅過千美元，跌到家陣得返400幾美元，不復當年勇，不過，Bitcoin其實已經唔經唔覺咁喺2015年做咗個三底，技術上預示其大有見底重拾長期升勢嘅可能。而事實上，Bitcoin由去年8月開始回升，由200美元唔夠升到11月初曾經逼近500美元，可惜當時衝唔破阻力，家陣就喺400幾美元左右整固緊。
中國拆彈要有序
Bitcoin會唔會展開新一輪牛市，要視乎中國點樣拆彈，控制人仔有序貶值，等貶值步伐唔好失控至釀成貨幣危機。
而對於散戶來講，筆者認為，如果手上有人仔坐緊艇嘅話，除咗買金之外，Bitcoin可能係用來對沖人民幣貶值嘅另類選擇。
當然，Bitcoin唔係對沖人仔貨值蒸發嘅唯一選擇，因為自去年11月開始，同人仔呈相反走向嘅資產，仲有傳統避險資產黃金。
雖然大媽搶金潮仲未出現，不過如果中國無法挽回市場對人民幣嘅信心，搶金潮再現只係遲早嘅事。
El.
本欄逢周二、五刊出