周日舉行嘅NFL季後賽外卡戰，作客嘅西雅圖海鷹隊喺攝氏零下21度嘅低溫下，上演咗一場絕地反擊戰；佢哋靠明尼蘇達維京人嘅踢球手巴利亞華殊（Blair Walsh）射失波，以10:9反勝維京人。
僅史上第三凍賽事
眾所周知，明尼蘇達位於美國嘅西北部，氣溫就不嬲都凍㗎喇；但估唔到喺呢場比賽開波嗰陣，球場竟然錄得攝氏零下21度，呢場亦都係NFL史上第三凍嘅比賽。差唔多個個入場嘅球迷都着到成隻糭咁，球會喺賽前都要免費派啲熱咖啡同暖手包畀佢哋保暖；班球員着得咁少衫都應該凍到震，佢哋喺賽場上講嘢都凍到噴煙。咁嘅天氣嚴重影響到兩隊嘅表現，而喺第三節仲落後0:9嘅海鷹隊，就要去到最後一節先攻下10分反超前。
維京人絕殺甩轆反敗
不過維京人喺主場球迷嘅支持下，臨完場26秒將最後一波攻勢推到27碼射門範圍之內，只要華殊射入就可以晉級；點知佢就好似占基利套笑片《神探飛機頭》入面嘅情節咁，因為踢中欖球嘅縫線而射失波，令維京人錯失反勝機會。華殊今次真係一失足成千古恨，佢喺賽後都勁自責：「輸波係我嘅錯。就算當時你畀個西瓜我踢，我都應該要射入。」