零售市道轉差，就連超人都話今年生意難做，本地商場為谷農曆年消費，宣傳部署上點都要搞多啲花臣先得。近期做宣傳做得最積極嘅，都算係新地（016），佢哋噚日為旗下商場做推廣，展出一系列年花，當中有一款新品種名為「蕙蘭水晶龍」好誇張，價值高達30萬元，但佢外表睇落同一棵葱冇乜大分別喎！
講真，30萬元，幾乎夠買一個地區偏遠些少嘅車位，遲下樓市再跌多啲，夠買樓畀首期都不是夢。呢棵似葱多過似花嘅蕙蘭水晶龍，原來珍貴在於非常稀有，物以罕為貴，噚日在場司儀都話，好多蘭花粉絲爭住要儲起佢。只可以話，華華對於賞花這回事真係一曉不通，只係知道身上有30萬閒錢嘅話，𥄫實股市低位買股票創造賺錢奇蹟好過。