民主黨主席劉慧卿冇報名黨內立法會選舉甄選機制，換言之放棄下屆競逐連任。卿姐一直好口密，花生友聽聞，事前都冇乜黨友知道卿姐點諗；而佢開記招公佈棄選消息嘅前一晚，特別約咗新東成班新當選區議員去鯉魚門食海鮮，趁班兄弟姊妹醉醉哋時，交代退下火線嘅決定，唔知有冇乜玄機？
花生友聽聞，當晚食飯一直閒話家常吹水，直至大家食到七七八八、酒酣耳熱之際，卿姐忽然講咗句唔選，大家聽到先係呆一呆，之後就有人打圓場，話卿姐咁多年來辛苦喇！有心水清嘅人發現，已經報名爭取代表民主黨循新東出戰嘅林卓廷，當時已經飲到腳步浮浮，唔通卿姐係特別睇準呢個時機？
阿廷勢上位 揸緊條數
有新東友同花生友傾開，阿廷得到黨內大佬力捧，加上區議會選舉贏咗漂亮一仗，牌面上大家都覺得佢坐定粒六選新東，之不過地區直選樁腳好緊要，但佢喺該區嘅資歷較淺，未必令兄弟全力以赴動員支持者，所以先會有卿姐排喺阿廷名單第二嘅說法，目的就係希望民主黨新東樁腳畀面卿姐，出力拉票。
花生友聽講，除咗資歷等原因，新東白鴿中人亦擔心阿廷上咗位後，未必好似卿姐做立法會議員時關顧班兄弟，邊個區開到聲需要資源都會盡力調撥，好多時仲倒貼㖭，反觀阿廷做過廉署，睇數一向好均真，相信佢喺資源調配會揸得緊啲。
花生友
周二、四刊出