不知是否流年不吉，1月過了僅三分一，公關災難已層出不窮，一單接一單。
不過坦白說，當中有些是騎呢，卻又不至於十分災難，只是今天網民反應真的快，你一出新聞稿，他們就來無限演繹，你一言我一語把水抽，公關原意徹底扭曲，咁你作為公關，搞宣傳真係要醒目啲囉，揀相、gimmick，任何細節都不可以掉以輕心。
這幾天，令Mary反應最大的災難是吳亮星的「洗頭艇論」，聽見一刻完全呆了，喂，這個真是立法會議員？保皇黨的？他真的認為這番話說了幫到阿爺？
不過，Mary的高人朋友常說，今年文昌化科入流年，成個社會會出現道理上的亢奮，爭拗多、強辭奪理是常態，人人滿嘴大道理，張口根本不為溝通，只為達到自己的終極目的而自說自話。
所以，回心一諗，吳議員有無真係咁蠢呢，不可能吧，換個角度看，會不會吳君其實另有盤算？
譬如說，佢今次會否其實是為了顧全大局，自願壯烈犧牲？五個書局友齊齊失蹤，滿城疑團，CY政府、阿爺嚴重受壓，由得輿論在網絡再發酵下去不是辦法，咁點算呢，或者佢諗住我不入地獄誰入地獄，等我幫阿爺捱一棍啦，分擔一下負評，都算幫過吓手吖。
還是經過東北發展一役，在立法會被圍，吳議員早已意興闌珊兼怕怕，為免下一屆再被「委以重任」，索性裝儍扮瘋，等各界人士看清楚，嗱，我癲㗎，諗真先好叫我再選呀，咦，知所進退，咁又蠢唔晒呀。最後一個假設，例牌啦，原來吳生係反間諜囉，真正身份係泛民特工009：佢嗰組特務另一勇將叫克儉，同姓，驗過DNA，係佢親生細佬。
彭瑪莉
mailto:[email protected]