米洛列特同阿當保丹要醒醒定定嘞，利物浦收番外借鴨巴甸嘅丹尼禾特，領隊高路普分分鐘搵丹尼禾特打正選，等米洛列特同阿當保丹好好反省吓。唔知係乜原因，利物浦由高巴拿開始，啲門將都有啲神經刀，首席門將米洛列特表現反覆，至於副選嘅阿當保丹更加係頻頻派膠；反而外借咗去蘇超踢鴨巴甸嘅丹尼禾特表現好好，今季有12場比賽保持清白之身。另外，利物浦最近簽咗個塞爾維亞新仔馬高古積，佢話呢單轉會差啲告吹，因為自己有幽閉空間恐懼症，好驚體測嗰陣入房做掃瞄；但最後佢都肯入去，克服咗心魔，轉會先至成功。