行善積德，福有攸歸，一向專注事業嘅古天樂，多年嚟一直低調行善，唔鍾意到處張揚，每次被記者問到捐錢嘅事，佢都例牌「唔回應」。
不過好事總係會傳千里，馮仁昭收到消息話，最近古仔又低調喺內地捐錢興建小學，早前佢喺內地已起咗65間，直到𠵱家已多達85間，令到唔少內地窮困嘅小孩可以免費讀書，即刻令人聯想起喺電影《五個小孩的校長》飾演校長楊千嬅老公嘅古仔，同樣默默地係背後支持千嬅為教育傳承。
源於汶川地震
古仔為內地建小學主要係因08年汶川大地震發生後，佢眼見豆腐渣工程害死唔少學生，為咗協助偏遠及農村地區，畀當地小朋友可以喺一個安全地方讀書。
自09年開始古仔就成立咗慈善基金，請咗一班義工負責內地監管興建小學工程，佢間中都會秘密到鄉村小學做義工，真係出錢又出力，平時唔多出聲嘅古仔被稱為Mr.Cool，其實佢係一個外冷內熱嘅人，有一顆善心，又容易心軟，事實佢私底下都經常四圍幫人，之不過甚少對其他人提起，所以大家都唔知道佢做咗咁多好人好事。
撰文：馮仁昭