恒基地產（012）主席李兆基（四叔）與新鴻基地產（016）大股東郭老太（鄺肖卿）認真勇敢，雖然今年一開波，港股連續幾日跌到啪啪聲，但係佢哋兩位都冇有怕，上周一港股因內地熔斷停市而大瀉，佢哋就出手掃入自己公司股票。
聯交所資料顯示，四叔上周一、周二合共斥資1,624萬元增持恒地，平均價大約46.5元。新地郭老太亦喺上周一出手，斥資1,210萬元增持新地，平均價91.651元。
慘就慘在，大孖沙肯抬錢支持公司股價，大市都冇面畀，股價繼續跌。恒地噚日收44.05元，跌3.3%，新地就跌1.6%，收報90.05元。四叔與郭老太買入呢批貨旋即錄得賬面虧損。
以目前市況，即使內地叫停咗熔斷機制，但係人民幣跌勢未止，市場又擔心內地經濟頂唔住，整體投資信心相當薄弱，四叔與郭老太今年應該仲有好多機會喺低位增持公司股票啊。不過又咁講，大股東增持從來都係信心嘅表現，加上佢哋大把平貨，增持價貴少少都冇乜影響，四叔舊年已經拎咗幾十億元增持恒地喇。