連建制派嘅青年專業人士都話要暫緩TSA，教育局局長認真唔得掂！青年專業聯盟趁特首梁振英發表施政報告前夕，噚日開記者會就8大專業範疇提24項建議，其中呼籲創新及科技局設立「跟投」基金，加大IT投入等都係穩陣之作，反而估唔到嘅係連佢哋都要求教育局暫緩TSA一年，唔通對吳克儉滿肚怨言？
八方問過身為召集人吳傑莊Johnny，佢冇特別評論吳克儉表現，但就話𠵱家嘅TSA安排，確實係有改善嘅地方，坦言身邊唔少家長朋友對此好有意見先代為發聲。
查實Johnny同時身任青聯常務副主席，IT界出身嘅佢去年底因為寫文批評八達通守舊兼不思進取，引嚟唔少人討論，甚至官媒《人民日報》都轉載過。唔知呢次官媒又會唔會代Johnny向北京轉達心聲？