上季幫熱刺入咗31球嘅哈利卡尼今季季初鬧入球荒，頭13場比賽入得嗰一球咁多。當球迷以為佢得一季貨仔時，去到10月尾佢終於嚟料，喺對般尼茅夫場波連中三元後，入波源源不絕。前晚英足盃第三圈，呢位22歲英格蘭國腳前鋒喺完場前一分鐘入12碼，協助球隊主場逼和李斯特城2:2；計埋呢一個入球，佢喺近14場比賽就幫熱刺入咗13球，真係「弗」爆。喺進行英足盃重賽之前，熱刺同李城聽日會喺英超相遇，消息話因傷冇踢呢場波嘅李城前鋒占美華迪有望傷癒復出，同哈利卡尼一較高低。