經民聯梁美芬喺區選中被青政小花游蕙禎追擊下險勝，似乎要開拓下年輕人選票，佢自爆呢排已經向年輕人學潮語，𠵱家知道「派膠」、「葡萄」、「放閃」、「OP」係乜嘢，近日仲開埋instagram戶口，總之有咁潮學咁潮。佢坦言建制派忽略咗網民呢個戰場、甚至連facebook賬戶都冇，強調即使網民多數係黃絲都要開拓吓，否則會全面失守。
九西立會下屆新增一席，曾經為梁美芬助選嘅工聯會擬派人迎戰，點算好？梁美芬話建制票源一定重叠，而自己有街坊支持；而俗稱「棚仔」嘅欽州街臨時小販市場交還牌照限期屆滿前，佢亦去咗了解，仲買咗一條有孔雀嘅圍巾（圖），盼政府成立天光墟幫布販。