新界東立法會議員劉慧卿宣佈退出議事堂，2016年任滿之後，不再參加競選，讓位給民主黨年青一輩。劉慧卿在新界東有大量支持者，如果佢出馬競選連任，勝算甚高，現在宣佈唔選，未免可惜。
睇番資料，劉慧卿62歲，做議員唔算太老，人哋希拉莉將近70歲喇，都搏命爭取成為美國總統啦，佢之所以唔再參選，可能係已經做議員做得太耐，有啲疲倦啩，況且佢與泛民同特區政府對抗多年，真係得個做字，最基本嘅真正雙普選都爭取唔到，以致心灰意冷，亦人之常情。
有一說講劉慧卿何俊仁等人已經out晒，要由年輕一代卒兵接棒，老嘢快啲退休，咪阻住世代交接！英國人、加拿大人、美國人，四十幾歲已做國家領袖啦，香港啲60幾歲人物仲霸住個位做乜？
世代交替，或者有道理。弊在香港冇牛津哈佛可以培養出啲一流政治人才，試問今天香港政壇啲三十至五十歲議員，由區議會到立法會，有邊一個似係真正有料到嘅政治人物？左丁山就揀唔出邊一個，在呢個年齡組別之中，搵一兩位話係真正叻過劉慧卿30年前嘅，要搵邊兩位？
劉慧卿唔入立法會，係真正做實事一派嘅損失。一位高官曾經在馬場同左丁山講過：「劉慧卿好麻煩，對住鏡頭鬧人唔駛本，但在小組會議檢視法例條文，真正審議嘅時候，佢係有經驗，英文好好，好幫到我哋手。啲民建聯工聯會議員普遍英文唔掂，有啲議員剩係識吹水，冇劉慧卿咁實在㗎。」理想議會組成應該係老中青三結合，美國眾議院有七八十歲議員，有三十歲出頭嘅議員，又有四十幾五十歲嘅人做議長，不虞斷層，但香港政治人才之闊度與深度與美國英國相差太遠，一旦有經驗肯做事之老牌議員（唔係講劉皇發）退出，由新一代無經驗人物接棒，不止是議會的損失，亦是全港市民之損失。
又由於湯家驊老早宣佈辭職，退出立法會，新界東要補選，有民建聯周浩鼎，公民黨楊岳橋會競選。周楊二人在新界東知名度低，如無民建聯工聯會及泛民力捧，相信冇乜選民會出嚟投票，現在變成係泛民與建制派之單打獨鬥，有些少「公投」意味，新界東選民呢次投票會係選「黨」而唔係選人（因兩個都唔識），呢場選舉會好政治掛帥！